Ялтау фермасында беренче тапкыр студентлар практика узды

Студентлар 20 марттан 15 апрельгә фермада практика үттеләр. “Практикантлар, нигездә, малларны маститка тикшерү үткәрделәр, әгәр ул ачыкланса, дәваладылар. Сыерларны, бозауларны  вакцинацияләүдә ярдәм иттеләр”, - ди “Август-Лениногорск” хуҗалыгының баш ветеринар табибы Илсур Гиниятуллин.

Студентлар әйтүенчә, практика вакытында шактый тәҗрибә тупларга өлгергәннәр. “Терлекләр белән төрле алымнарны, хәрәкәтләрне без моңарчы бары теориядә генә өйрәндек. Ә монда – практикада остазлар практик өлештә барысын да аңлаешлы итеп сөйлиләр, күрсәтәләр. Безгә бөтен нәрсәдә булыштылар һәм бер-беребезне аңлап эшләдек. Монда шунысына игътибар иттек: “Ялтау” фермасында барлык санитар таләпләр һәм беркетмәләр катгый үтәлә, безгә дә моны өйрәттеләр”, - дип хис-кичерешләре белән уртаклашалар Казан дәүләт ветеринар медицина академиясенең 4 курс студентлары Альбина Каникова, Варвара Лобачева, Людмила Рублева.

Бозауның дөньяга тууын күрү, кечкенә дүртаяклыга яңа тормыш бүләк итүдә катнашу  – студент кызларда онытылмаслык тәэсирләр калдырган.

-    Шулай ук без төрле сыерлар “телен” дә аңларга өйрәндек, төрле манипуляцияләр үткәрдек. Воронеж сыерларыннан аермалы буларак, голштин токымлылар бик үткен, усал, үзләренә аерым игътибар таләп итә, - ди кызлар.

“Монда күңелгә ятышлы коллектив, безгә булыштылар. Башта югары ритм белән эшләүче фермага һәм ферманың эш режимына күнегергә авыр булды. Әгәр безне алсалар, 5нче курста да монда киләчәкбез, - ди практикант кызлар.

Безнең Телеграм-каналга кушылыгыз: https://t.me/zamansulyshy