Лениногорскилыны дус хатынын яндырган өчен 15 елга төрмәгә озаттылар

Районның Шөгер авылы кешесенә карата суд тарафыннан хөкем чыгарылды.

Исегезгә төшерик: узган елның августында алар Шөгер урманында ял итәләр. Әлбәттә, спиртлы эчемлекләр дә кулланганнар. Хатын-кыз йоклап киткәч, ир-ат аның өстендәге киемнәргә ут төртә. Күп төрле пешүләр алу нәтиҗәсендә хатын-кыз үлә. Аңа 32 яшь була.

Беркадәр вакыт үткәч, ир-ат полициягә шалтырата һәм урманда дус хатынын үле килеш таптым дип алдый.

Әлеге ир-атның гаебе суд тарафыннан дәлилләнде. Аны 15 елга ирегеннән мәхрүм иттеләр, ул катгый режимлы колониядә үткәрәчәк.