Биш ел эчендә Татарстан юлларында 69 бала һәлак булган

2021 елдан 2025 елга кадәр Татарстан юлларында 69 бала һәлак булган. Бу хакта матбугат конференциясендә ТР буенча Дәүләт автоинспекциясе идарәсе башлыгы урынбасары Дамир Бикмөхәммәтов хәбәр итте. Быел, спикер мәгълүматлары буенча, республикада балалар катнашында 206 юл-транспорт һәлакәте теркәлгән, аларда 6 бала һәлак булган һәм 221 бала яраланган.

«25 бала нәкъ менә җәйге чорда, балаларның буш вакытлары күбрәк булганда һәлак булды: алар пассажир сыйфатында автомобильләрдә йөриләр, велосипедлар, самокатлар йөртәләр», — дип ассызыклады Бикмөхәммәтов.

Моннан тыш, спикер белдергәнчә, быел җәяүле балалар белән 88 юл-транспорт һәлакәте теркәлгән  – аларда 89 бала җәрәхәтләр алган. 2026 ел башыннан питбайклар катнашында аварияләр булды, аларда яшүсмерләр һәлак булды. Спикер мәгълүматлары буенча, Бөгелмә районында 14 яшьлек кыз, питбайк белән идарә иткәндә, куркынычсыз тизлекне сайламаган, каршы якка чыккан һәм электр линиясе терәгенә бәрелгән. Һәлакәт нәтиҗәсендә ул урында ук үлә, ә 13 яшьлек пассажир җәрәхәтләр ала.

Профилактика максатларында, быелның гыйнварыннан ДАИ  балалар тарафыннан юл хәрәкәте кагыйдәләрен бозуның 460 очрагына чик куйган.  Бикмөхәммәтов әлеге материалларның юл хәрәкәте кагыйдәләренә һәм балигъ булмаганнар эшләре буенча комиссиягә баланы профилактик исәпкә кую өчен җибәрелүен искәртте. Бу очракта ата-аналарны административ җаваплылыкка тарталар. 2026 елда Административ хокук бозулар турында 86 эш кузгатылган — ата-аналарга 500-2 мең сум штраф яный.

БИЗНЕС Online