Сыерга – 3000, кәҗәгә 1000 сум акча бирелә

Сыер асраучыларга быел да дәүләт ярдәме каралган. Татарстанның Авыл хуҗалыгы һәм азык-төлек министрлыгы матбугат хезмәте хәбәр итүенчә, бер баш савым сыерына - 3000 сум, бер баш ана кәҗәгә һәм бер яшьтән олырак булган кәҗә бәтиенә 1000 сум субсидия бирелә.

Аны алу өчен шәһәр һәм авыл җирлекләренең башкарма комитетларына гариза тапшырырга кирәк. Гаризада почта адресы, сыерлар, ана кәҗәләр һәм бер яшьтән олырак булган кәҗә бәтиләре саны, субсидияне күчерү рәвешләре (банк счетына күчеререгә яисә түләү ведомосте буенча шәхсән кулга алырга - мөрәҗәгать итүченең теләге буенча) һәм 2016 елның 31 декабренә кадәр әлеге хайваннарның баш санын киметмәү буенча гарантияләр күрсәтелергә тиеш.