ТР Дәүләт алкоголь инспекциясе торак йортларда сыра сатуны тыюны сорады

ТР Дәүләт алкоголь инспекциясенең административ һәм суд практикасы бүлеге начальнигы урынбасары Ильяс Җамалетдинов торак йортлардагы кибетләрдә сыра һәм сыра эчемлекләрен ваклап сатуны тыярга тәкъдим итте. Бу хакта ул  ТР Дәүләт Советының Икътисад, инвестицияләр һәм эшкуарлык комитеты утырышында белдерде.

«Дәүләт алкоголь инспекциясе № 10-ТРЗ республика законына үзгәрешләр кертергә тәкъдим итә, ул күп фатирлы йортларда, алар янындагы биналарда, күпфатирлы торак йортларның ишегалларында урнашкан аерым биналарда урнашкан сәүдә объектларында алкогольле продукцияне ваклап сатуны - бүлеп сатуны (салып бирү) тыю. Бүген гамәлдәге законга шундый төзәтмәне эшләү актуаль дип саныйм», – диде Җамалетдинов.

Аның фикеренчә, күп фатирлы йортларда алкогольле продукцияне ваклап сатуны тулысынча тыю - чамадан тыш чара.

«Шул ук вакытта күп фатирлы йортларда мондый сәүдә объектларын урнаштыру белән сыра сату эшчәнлеге киң таралыш ала. Еш кына күп фатирлы йортта сыраны бүлеп сатучы берничә сәүдә объекты урнаштырыла, бу әлеге йортларда яшәүче гражданнардан канәгатьсезлек уята. Мондый объектлар асоциаль яшәү рәвеше алып баручы кешеләрне җәлеп итү ноктасы булып тора", - дип билгеләп үтте ул.

Докладчы Краснодар краен, Тула һәм Курск өлкәләрен мисал итеп китерде. Анда сыра һәм сыра эчемлекләрен, сидр, пуаре һәм медовуханы күп фатирлы йортларда һәм алар янындагы янкормаларда урнашкан кибетләрдә бүлеп сатуны тыючы төбәк законнары кабул ителгән.

Җамалетдинов Татарстанда сыра һәм сыра эчемлекләрен 10 меңгә якын сәүдә объектында сату алып барыла, дип ассызыклады.

Парламент комитеты рәисе Лотфулла Шәфигуллин фикеренчә, «бу актуаль мәсьәлә, аны өйрәнү һәм анализлау таләп ителә». Депутат комитет әлеге тәкъдимне караячак, дип ышандырды.

https://www.tatar-inform.ru

Фото: https://pixabay.com/ru