Салымнарны сагыналар

Кремльдә иске яңа Президентның ун өстенлекле юнәлеш буенча максатчан указлары әзерләнә. Аның өчен бер триллионнан алып ике триллион сумга кадәр акча кирәк булыр, дип исәпләнелә. Җитеш­те­рүне арттыру, импортны алыштыру, читкә товар сатуны күбәйтү кебек алымнар барып чыкмады, хәзер гадирәк юлдан кит­мәкчеләр: салым түләүчеләр җилкәсе­нә яңа камытлар киертергә җыеналар.

Дәү­ләт Думасында инде физик затларның ке­ременә салымнарны арттыру турында ике закон проекты әзерләп куйганнар. Безнең кесәләрне прогрессив шкала белән юкартырга ниятлиләр. Хөкүмәт моңарчы 13 процент булган бу салымны 15 процентка җиткермәкче. Кереме бик аз булганнар әлеге салымнан азат ителер дип көтелә. 

“Кара алтын“га салымның да астын өскә әйләндерергә: экспорт пошлинасын киметеп, файдалы казылмалар чыгарган өчен ясакны арттырырга уйлыйлар. Кайчандыр булып онытылган сәүдә салымын яңадан кайтарырга да теләкләр бик зур. Өстәмә кыйммәткә салымны (НДС) үстерү идеясе бик көчле. Хәзер 18 процент кына булган бу салым 22 процентка кадәр күтәрелергә ихтимал. Бу салымны түләгән­дә өстенлек­ләрдән файдаланучылар өс­тен­лек­ләрен югалтырга тиеш.

Аңлашыла инде: НДС салымы автомат рәвештә бәя­ләрне күтә­рә­чәк, шуңа сәүдә салымын да китереп кушкач, физик затлар кеременә арттырылган салым нәтиҗәсендә юкарган кесәләр­дән, кибет киштәләре янына кил­гәч, җил­ләр исә башлаячак. Дөрес, ими­ниятләштерү взнослары шактый гына киметелер дип көтелә, чөнки аларны җыю көннән-көн кыенлаша. Күп кенә ком­панияләр инде иминиятләштерү взносын түләмәүнең законлы ысулын таптылар һәм шуны файдаланалар. Физик затлар­ның кеременә салым түләү ихтыяҗы да юкка чыга һәм эш бирүче дә, эшләүче дә ота, салым җыю­чылар да бәйләнә алмый. Газета хәбәрчесе бу ысулны өйрәнде һәм хуплый. Акчаны конвертта бирүгә караганда отышлырак булган бу юлны кулланучы компанияләр саны киләчәктә артыр дип көтелә. Хәзерге вакытта аны IT өлкәдә бик актив файдаланалар.
Ябык сыерны ашатмыйча гына сөт савуны арттыруга яисә арык сарыктан күб­рәк йон кыркырга омтылуга охшаган яңа салым проектлары тормышка аша калганда, билгеле инде, икътисад өчен бернинди дә файда булмаячак. Куллану кимү сәбәп­ле, җитештерүчеләр ябыгачак, сәүдә торгынлык кичерәчәк, икътисад яңа рецес­сиягә килеп керәчәк.

http://www.vatantat.ru/

фото: https://go.mail.ru/search_images?rf=11956636&fm=1&gp=800000&q=%D0%BD%D0%B0%D0%BB%D0%BE%D0%B3%D0%B8%20%D1%84%D0%BE%D1%82%D0%BE&frm=web#urlhash=3518536512482734488