Таһир Шәмсуаров: "Хатын-кызга чәчәк бирегез"

Хатын-кызга чәчәк бирегез!

Аның исеме белән уянабыз,

Гүзәллеген аның күрегез.

Бәйрәмдә дә, мондый көннәрдә дә,

Хатын-кызга чәчәк бирегез!

Ул ярату өчен яратылган,

Тик назларга аны төрегез.

Кышкы көндә җаны эреп китәр,

Хатын-кызга чәчәк бирегез!

Аңа атап күпме шигырь туа,

Яле берсен сөйләп бирегез.

Тик шатлыктан тамсын күз яшьләре,

Хатын-кызга чәчәк бирегез!

Арып-талып эштән кайтсагыз да,

Сез елмаеп өйгә керегез.

Күзләрендә сөю-сагыну аның,

Хатын-кызга чәчәк бирегез!

Туган көндә лаек бүләк эзлә,

Әзерлеген алдан күрегез.

Мәңге балкыр тормыш гөле бит ул,

Хатын-кызга чәчәк бирегез!

Таһир Шәмсуаров