Фирдүс Тямаев: "Төркемне тоту өчен, бер айга 1 миллионнан артык акча кирәк"

Җырчылар да менә инде икенче ай концертларын уздыра алмый. Күпме планлаштырган концерт билгесез вакытка күчерелде. Шулай да, Фирдүс Тямаев артык төшенкелеккә бирелми.  \

"Нишлисең, берәүгә дә җиңел түгел бүген. Барлык артистларның да хәле катлаулы. Шулай да, мин артык төшенкелеккә бирелмим әле. Үз төркемемдә эшләүчеләргә бер ай алдан хезмәт хакын түләп куйдым. Март, апрель өчен кредитлары булганнарга инде акча күчердем. Әкренләп булышабыз инде. Әлегә шулай. Ләкин карантин бик озакка сузылса, хәлләр начарланса, автобусны сатарга туры килер, мөгаен. Чөнки төркемне тотар өчен миңа аена 1,2 миллион акча кирәк. Әле бит кредитлар да бар. Алар булмаса, җиңелрәк булыр иде. Барсы да яхшы булыр, Алла бирса, ачтан үлмәбез", - дип сөйләгән ул үзенең "Бизнес онлайн" сайтына биргән интервьюсында.

"Мин дөнья малы артыннан кумыйм, Аллага таянып, яши бирәм. Кайгырып авыруга сабышу, ничек яшим икән, дип кайгыга батып яту, миңа хас түгел," - ди Фирдүс.  

Әйе, Фирдүснең кулыннан эш килә. Төркемендәге егетләрнең дә күбесен вакытлыча төзелешкә урнаштырган инде ул. Ничек тә ярдәм итергә тырыша. Ә үзе президент рөхсәт итсә, Казан урамына чыгып, берәр йорт каршында концерт куярга тели икән. "Тамашачыларның балконнан кул чапканнарын булса да ишетер идек", - дигән ул әңгәмә барышында.   

Чыганак: Матбугат.ру

http://shahrichalli.ru/news/kich-bgen-irtg/firds-tyamaev-trkemne-totu-chen-ber-ayga-1-millionnan-artyk-akcha-kirk-tulyrak-httpsmatbugatrunewsid28925