Могҗизалы корт икмәге турында файдалы мәгълүмат

Бал корты тарафыннан әзерләнгән һәр продукт искиткеч сыйфатларга ия. Шуның иң могҗизалысы, мөгаен, корт икмәгедер (перга). Аның файдасы санап бетергесез.

Иң беренче чиратта, ул нерв һәм эндокрин система, ашказаны һәм ашкайнату органнары (ашказанында яки уникеилле эчәктә җәрәхәт булганда да) авыруларыннан дәва чарасы буларак файдаланыла. Кандагы гемоглобинны һәм эритроцитлар санын арттыра, организмның төрле вирусларга каршы торучанлыгын көчәйтә. Туберкулез, простатит, анемия һәм башка авырулардан да ярдәм итә. Организмның вакытыннан алда картаюын чикли, склерозга каршы бик көчле чара санала.

Аны косметик максатларда кулланганда да, башка чаралардан аермалы буларак, нәтиҗәсе озак көттерми. Составында корт икмәге булган баллы масканы бер-ике тапкыр битегезгә ясасагыз, тирегезнең бәрхет кебек йомшак булуын, кара бетчәләрнең югалуын, бит күзәнәкләренең чистаруын тоярсыз. Даими рәвештә кулланган хатын-кызлар күп җыерчыкларның эзсез югалуын да тоймый калмас.

Корт икмәген белеп кулланучы умартачыларның озак яшәве, картлыкта да бик сәламәт булуы, склероз кебек зәхмәттән интекмәве билгеле.

Үзенең файдалы сыйфатларын ул чәчәктән ала. Юкка гына үләнне яз көне яисә чәчәк ату чорында җыярга кушмыйлар. Үсемлекнең иң файдалы матдәләре нәкъ менә чәчәкнең серкәсендә җыела да инде.

Профилактик чара максатында аны көненә нибары 10 грамм гына һәм ашаганнан соң куллану кирәк.

Әлеге продуктны кулланыр алдыннан табиб белән киңәшү зарур.

Чыганак: http://tulachi.ru/ru/