Лениногорскида чыккан янгын 15 кешене юк итә язды

Лермонтов урамындагы йортларның берсеннән бердәм диспетчерлык хезмәтенә янгын турында хәбәр килә. Шунда ук 66нчы янгын сүндерү частенә хәбәр җибәрелә.

Янгын чыккан урынга коткаручылар, ашыгыч ярдәм хезмәткәрләре, электр челтәрләре хезмәткәрләре килә.
Алар килгәндә йортта яшәүчеләр урамга чыгып, подъезд янында җыелган булалар. Ярый әле янгынны вакытында күреп, бәхетсезлек очрагы булмый кала. Бары бер ир-атка гына медицина ярдәме кирәгә, аңа ярдәм күрсәтелә, ул үзен яхшы хис итә башлый.

Янгын тиз арада сүндерелә. Янгын сүндерүчеләр сүзләренә караганда, фатирларның берсендә карават янып китү фаҗига китереп чыгарган. Ә карават нилектән янган, анысын дознавательләр тикшерә.