Лениногорскилылар әфганчыларны искә алды

Соңгы совет солдаты Әфганстан җирен калдырып чыкканга 29 ел тулды. Әлеге чарага багышланган митингка әфган сугышы һәм башка кайнар нокталарда хезмәт иткән ветераннар, шәһәр җәмәгатьчелеге, студентлар, укучылар җыелды. Әти-әниләрнең йөрәкләре һаман да сыкрый.

- Бүген изге хәтер көне, без тынычлык, имин тормыш өчен башларын салган егетләрне хөрмәтләп искә алабыз. Алар Әфганстан халыкларының тынычлыгы өчен көрәшеп, үз Ватаннарының батыр улларына әверелделәр, - дип билгеләп үтте, сугышчы-интернационалистларны, җыелган халыкны сәламләп шәһәр башлыгы Рәгать Хөсәенов.

Гомерләре әнә шулай иртә өзелгән якташларыбыз бер минут тынлык белән искә алынды һәм һәйкәлгә чәчәкләр салынды.

Зилә Мөдәррисова фотолары