Район башлыгы Республика көне белән котлый

Хөрмәтле лениногорскилылар!

Сезне чын күңелдән Татарстан Республикасы көне белән тәбрик итәм! Барыбызны да берләштерә торган, халкыбызның күңелендә горурлык хисләре уятучы һәм яңадан-яңа мөмкинлекләр ачучы бәйрәмнәрнең берсе ул.

Татарстан үзгәрде, киләчәккә омтылучы алдынгы республика буларак дөньяга танылды. Шунысы аеруча кадерле: без кешеләр арасындагы яхшы мөгамәләне саклап кала алдык. Гаиләнең, милли үзенчәлекләрнең кыйммәте, өлкән буыннар хезмәтенә хөрмәт һәм бер-береңә ярдәм, ватанпәрвәрлек - болар барысы да сакланды, алар уртак киләчәгебезнең какшамас нигезләре булып калырга тиеш.

Бүген Татарстан Республикасы - югары үсешкә ирешкән куәтле төбәк. Кадерле дуслар, үзенең казанышлары белән ул сезгә - татарстанлыларга бурычлы!

Сезгә ихлас рәхмәт сүзләремне җиткерәм һәм һәммәгезгә дә нык сәламәтлек, күтәренке рух, бәхет һәм мул, тату тормыш теләп калам.

Рәгать ХӨСӘЕНОВ,

муниципаль район башлыгы, шәһәр мэры