Рәмзия Габделхакованың ветераннарга багышлап язган шигыре

Нинди кешеләр бар иде!
(әтием истәлегенә) 
Нинди кешеләр бар иде! 
Күреп, тыңлап туймаслык! 
Алтынга тиң киңәшләрен
Гомер буе җуймаслык. 

Нинди кешеләр бар иде! 
Арысландай гайрәтле, 
Кояштай якты күңелле,
 Галәмдәй зур йөрәкле.

Нинди кешеләр бар иде!
Утлар-суларны кичкән, 
Хәрәбәләрне торгызып,
 Җирне кабат гөл иткән! 

Нинди кешеләр бар иде! 
Сагынып искә алырлык.
Игелекле гамәлләре 
Мәңге истә калырлык!