Лениногорскиның МХО хәрбие кыска вакытлы ялда сөйгәне белән никахларын рәсмиләштерде

Якташ хәрби Альберт кыска вакытлы ялга кайткач, үзенең яраткан кызы Анна белән гаилә корырга дигән карарга килә. Ул мобилизация буенча хезмәт итеп, илебез тынычлыгы өчен көрәшә.

Хәзер инде аның исән-имин кайтканын законлы хатыны да көтеп торачак.

Кияү белән кәләш Мендельсон маршы көе уйнап торганда залга керделәр. Балдаклар алыштылар,  бер-берсен яратырга һәм тугры булырга вәгъдә бирештеләр. Аннары  туй вальсында әйләнделәр, дип хәбәр итә ЗАГС бүлеге.

Әйдәгез, бераз гына хәрбинең тормышы, МХОдагы хәлләр турында ачыклык кертик.

Альберт 1990 елның 8 февралендә туган. Мәктәптән соң техникумга укырга кергән. Биредә шахмат уйный, спорт белән шөгыльләнә. Укуын тәмамлагач, эшкә урнаша. Эшләү дәверендә хезмәттәшләре арасында хөрмәт казана, аны ихтирам итәләр. Иҗтимагый эшләрдән, мәдәни чаралардан читтә калмый.

2022 елның февралендә илдә игълан ителгән мобилизация аңа да кагылмыйча калмый. 28 октябрьдә ул илне сакларга китә. Казанда хәрби тәҗрибәгә ия инструктор-остазлар җитәкчелегендә мобилизацияләнгән хәрбиләр көн саен диверсион разведка төркемнәренә (ДРГ) каршы тору мәсьәләләрен тикшерәләр, позицияләрнең инженерлык җиһазлары сорауларын һәм пилотсыз очу аппаратлары белән эшләү методикасын өйрәнәләр. Аннары исә хәрби операция зонасына юл тоталар.

Биредә ул “Альф” позывное ала, үзенең исемендәге беренче өч хәреф һәм әтисенең исемендәге беренче хәрефтән тора.
Биредә Альберт сапер вазыйфасына керешә. Көн саен инженерлык бүлекчәләре Донецк һәм Луганск Халык Республикаларының азат ителгән территорияләрендәге шартлау куркынычы булган җайланмаларны зарарсызландыра: танкка каршы миналар, фугас снарядлары, шартламаган дроннар – болар белән эш итәргә туры килә аңа.

 Ул мотоукчы полк составында көн саен үз гомерен куркыныч астына куеп, иптәшләрен коткару өчен көрәшә.

Әлбәттә, беренче мәлдә бик нык авыр булган, аннары үзе әйткәнчә, кеше бар нәрсәгә ияләшә. Суга кытлык булган чаклар да күп була, ди. Тагын бер проблема – ул табигатьтәге пычраклык, баткаклык. Ул пычрак җиң эченнән дә үтеп керә, якада да була, шуның белән йокларга да туры килә, ди.

“Мин Сахалинда инженер гаскәрләрендә армиядә булдым. Сугыш хәрәкәтләрен алып баруның хәзерге методлары безне элекке елларда өйрәткәннәрдән шактый аерыла. Бу элемтә һәм разведка өчен спутниклар, ерак радиуслы пилотсыз очу аппаратлары һәм квадрокоптерлар, танкка каршы идарә ителә торган ракеталар (ПТУР) өлкәсендә зур алга китеш”, - ди “Альф”.

2024 елның апрелендә хәрби бурычларны намуслы үтәгәне өчен Россия Федерациясе Оборона министрлыгы тарафыннан Альберт «Махсус хәрби операциядә катнашучы» медале белән бүләкләнгән.

Уллары белән аның әти-әнисе: Фирдәүс Минәхмәтович һәм Фатыйма ханым, сеңелесе Эльвина горурлана.

“Альф” позывное алган хәрби кәләше белән моннан 5 ел элек танышканнар. Аннары бергә яши башлыйлар.  “Ул – минем өчен якын кешем, таянычым. Уңган, тәмле итеп пешерә”, - ди Альберт.

Һәм менә кыска вакытлы ялга кайткач, ул аңа тәкъдим ясый. ЗАГСта мөнәсәбәтләрен рәсмиләштерәләр, мәчеттә никах укыталар.

Аларга бәхетле тормыш телибез, хәрбигә тиз арада җиңү белән кайтырга язсын.

фотолар: ЗАГС бүлегеннән