Ботулизм Татарстанга да килеп җитте

Нәрсә ул ботулизм? Ул кеше организмына ничек керә һәм аның симптомнары нинди? Бу сорауларга «Татар-информ»га санитар табиблар һәм инфекционистлар җавап бирде.

«Ботулизм – ботулотоксиннар китереп чыгарган азык токсикоинфекциясе. Хәзерге вакытта 7 ботулотоксин билгеле: «A», «B», «C», «D», «E», «F» һәм «G». Аларның иң куркынычлары «А» төрендәге токсин дип санала. Еш кына авыруны өч ботулотоксин – «A», «B» һәм «E» китереп чыгара, – дип сөйләде «Татар-информ»га Татарстан Сәламәтлек саклау министрлыгының баш инфекционисты Халит Хәертынов.

Инфекционист сүзләренчә, ботулизм җиңел дә, бик авыр да үтәргә мөмкин. Бу авыруның иң куркыныч ягы – сулыш алуның бозылуы. 

Ботулизмның башка симптомнары:

- мимика һәм күрү сәләте бозылу, күз алдында томан, күзләрдә – икеләнү;

- кеше өске күз кабакларын тулысынча күтәрә алмый, алар аска төшеп тора;

- йоту кыенлаша;

- тавыш үзгәрергә мөмкин, сөйләм аңлашылмый;

- баш авырту, көчле хәлсезлек;

- авыз корылыгы.

Ботулизм белән авыручыларның өчтән бер өлеше коса, һәм диарея була. Сүз уңаеннан, санап үтелгән симптомнарның кайберләре инсульт кебек күренә, шуңа күрә куркыныч авыруны шунда ук белеп алмыйлар.

Табиблар билгеләп үткәнчә, ботулизм кешедән кешегә күчми, ул организмга токсинлы ризык белән генә керә ала.

Роспотребнадзорның Татарстан буенча идарәсе мәгълүматларына караганда, гөмбә, яшелчә яки җиләк-җимешләрдән консервалар, шулай ук суган һәм ысланган балык, өй колбасасы, вакуум пакетларыннан балык ашап йоктырырга мөмкин. Бигрәк тә өй консервалары ясаганда яшелчәләр, җиләк-җимешләр яки гөмбәләр начар юылган яки салкын урында сакланмаган булса. Халит Хаертынов, үз чиратында, ботулизм белән авырмас өчен, чыгышы билгесез булган продуктларны, бигрәк тә әзер продукцияне ашамаска кирәклеген ассызыклады.

"Интертат"