Перспективалы танышу

Профориентацион экскурсия предприятиенең «Калейкино» нефть суырту станциясендә узды. Проектта катнашучылар насосларның ничек эшләве, резервуарларның нинди биеклекләрдә булуы һәм нефтьнең сыйфатын нәрсә ярдәмендә билгеләүләре турында белделәр.

Һөнәрләр турында белемне арттыру

Мәктәп каникуллары ял итү өчен генә түгел, ә киләчәк һөнәр турында уйлану өчен дә яхшы вакыт. Бигрәк тә җитештерү процессының үзәгендә булу, үз эшенең осталарыннан киңәш ишетү һәм эшчәнлегеңне нәкъ менә шушы юнәлеш белән бәйләргә телисеңме икәнен аңлау өчен уникаль мөмкинлек булганда. Мондый уңыш Лениногорск шәһәренең 6 нчы урта белем бирү мәктәбенең 19 өлкән сыйныф укучыларына тәтеде. Кунакчыл торба уздыручылар зур горурлык белән аларга үзләренең объектларын күрсәттеләр, аның турында кызыклы һәм мөһим мәгъләматлар сөйләделәр.

«Балаларга һөнәрләрнең нечкәлекләрен белү, бигрәк тә техник һөнәрләрне күзаллау авыр. Шуңа күрә мондый экскурсияләр бик кирәк һәм мөһим. Кайбер һөнәрләр турында алар хәтта белмәгәннәр дә!» — ди, балаларны экскурсиягә алып килгән Лениногорск шәһәренең 6 нчы урта гомуми белем бирү мәктәбенең математика укытучысы Регина Галимова.

Нефтьне берләштерү системасы, резервуар паркы, магистраль насос станциясе, май системасы, сынау лабораториясе. Әгәр элек мәктәп укучылары боларның күбесе турында ишетмәгән дә булса, биредә барысын да ничек эшләвен күрделәр һәм аңладылар. Хәер, «нефтянка» га барачакларын төгәл белгән егетләр дә бар иде.

«Киләчәктә углеводородларны тотрыклы транспортировкалауны тәэмин итүче технологияләр белән эшләячәкмен дип уйладым, нәкъ менә шушы өлкәдә белгечлек алырга теләр идем», — ди Кирилл Мавлин.

Сынау лабораториясендә исә балаларга югары төгәллектә эшләүче приборларны күрсәттеләр. Айгөл Кәримова боларның күбесен белә һәм аңлый. Киләчәктә аның химия буенча БДИ тапшырасы бар, шуңа күрә лаборатория башлыгы Наталья Ереминаның һәр сүзен тын да алмый тыңлады.

«Алдагы имтиханга әзерләнәм, шуңа күрә миңа лабораториядә сөйләгәннәр кызыклы һәм аңлаешлы булды. Хәзер мин төгәл инандым: химияне „югары билге“ гә тапшырырга кирәк», — дип тәэсирләре белән уртаклашты Айгөл.

Аңлы сайлау — квалификацияле кадрлар

Бу көнне станция башлыгы урынбасары Тимур Сәгыйров балалар өчен сабыр һәм бар нәрсәне белүче гид ролен башкарды. Һәр объектта сорауларның чиге юк иде — җавап бирергә генә өлгер. Бу резервуар паркындагы «кәрәзле элемтә манаралары» — ул нәрсә? Ни өчен каре бетон яки асфальт белән түгел, ә вак таштан капланган? Аның герметик сыйфаты ничек тәэмин ителә? Станция белгечләре алдан әзерләнгәнгә күрә, бер генә сорауда җавапсыз калмады.

«Сүз уңаеннан, станция белән таныштыруга әзерлек барышында безнең күп кенә хезмәткәрләребез дә үз вакытында „Транснефть“ объектларында шундый ук экскурсантлар булганлыгы ачыкланды — кемдер мәктәптән, кемдер институттан килгән. Җитештерү белән танышу алар өчен бүгенге эш урынын билгеләүче факторларның берсе булган», — дип билгеләп үтте Тимур Илгизович.

Профориентацион юнәлеш бирү эшчәнлеге «Транснефть — Прикамье» АҖ тарафыннан системалы рәвештә һәм күптәннән алып барыла. Предприятие өчен торба үткәргеч транспорты өлкәсендәге һөнәрләрне популярлаштыру һәм яшьләргә вакытында профориентация бирү бик мөһим. «Киләчәккә билет» кебек проектларда партнерлык ярдәмендә тагын да күбрәк талантлы егетләр вакытында кирәкле ориентилар алып, үз һөнәр юлларын таба алачаклар. Профориентацион экскурсияләр торба үткәргечләр өчен «якын» булган компетенцияләрне күп санлы укучыларга күрсәтергә, аларда нәкъ менә нефть һәм нефть продуктларын торба үткәргеч транспорты өлкәсендә белем алуны дәвам итүгә кызыксыну уятырга мөмкинлек бирә.

Предприятие проектның төбәк операторы булган Татарстан Республикасының алдынгы һөнәри әзерлек үзәге (ЦООП) белән килешү кысаларында «Киләчәккә билет» проектының партнеры булды. ТР Үзәк сайлау комиссиясе җитәкчесе урынбасары Марина Матвеева билгеләп үткәнчә, проект кысаларында хезмәттәшлек һөнәри үзбилгеләнүгә һәм яшүсмерләрнең киләчәк һөнәрне аңлы сайлавына ярдәм итә, ә предприятие киләчәктә квалификацияле кадрларга үз ихтыяҗын киметә. Шулай булгач һәркемнең киләчәккә билетлар алу мөмкинлеге бар.

Белешмә өчен

«Киләчәккә билет» гомуми белем бирү оешмаларының 6-11 сыйныф укучыларына иртә һөнәри юнәлеш бирү проекты Россия Президенты Владимир Путин инициативасы нәтиҗәсендә оештырылды, һәм «Мәгариф» милли проектының «Һәр баланың уңышы» федераль проекты кысаларында гамәлгә ашырыла.
Проектның бурычлары түбәндәгеләр: укучыларның һөнәри өстенлекләрен һәм аларның һөнәри өлкәләр турында хәбәрдарлык дәрәҗәсен күрсәтүче тест үткәрү; проектта катнашучыларны һөнәри үзбилгеләнү белән бәйле гомуми мәдәни компетенцияләр буенча онлайн-курслар белән тәэмин итү; проектта катнашучыларга һөнәри компетенцияләргә нигезле рәвештә һөнәри юнәлеш бирү максатларында чараларда катнашу хокукын раслый торган проектның һөнәри юнәлешле чараларында катнашу мөмкинлеген бирү.