Иске Иштирәктә агрофирма хезмәткәрләре ландшафт буенча дизайнер булып эшләделәр

“Август-Лениногорск” агрофирмасының Иске Иштирәк бүлекчәсендәге офис каршысы якты төсләр белән балкып утыра.

Предприятиенең уңган хатын-кызлары 200дән артык чәчәк үсентеләре, куаклыклар һәм агачлар утыртты. Шулай ук бу эшкә студент-практикантлар да кушылды. Хезмәткәрләр үзләре ландшафт буенча дизайнер булды: үзләре композицияне уйлап чыгарды, үзләре утырту схемасын ясадылар. Агачлардан: алмагач, чия, груша, черешня үзләренең җимешләре белән сөендерер әле.

Агрофирманың административ бинасы Иске Иштирәкнең үзәк урамында урнашкан. Шунлыктан әлеге чәчәклек урыны үтеп-китеп йөрүчеләрнең игътибарын җәлеп итә икән. “Бигрәк матур ясагансыз”, “Бу бөтенләй икенче төрле булган”, дип мактап китәләр. Үз киңәшләрен дә бирүчеләр юк түгел икән.

-    Безнең офисның территориясе – оешманың “йөзе” бит. Менә шулай матурлык ясап куйгач, күңелгә дә рәхәт булып китте. Бу идеяне предприятие җитәкчеләре тәкъдим итте, аларга рәхмәт. Барлык хезмәткәрләргә дә бу урын ошыйдыр, дип уйлыйм, - ди “Август-Лениногорск” агрофирмасының кадрлар буенча инспекторы Рузилә Нуртдинова.

Үсентеләр Керкәле авылындагы объектлар каршында да утыртылган.