Лениногорскиның 10нчы балалар бакчасы тәрбиячесе Виктория Цыганова - Татарстанның иң яхшы тәрбиячесе

 21 мартта Казанда “Россиянең ел тәрбиячесе -2025” Бөтенроссия конкурсының республика этабы җиңүчеләрен билгеләделәр.

Республиканың иң яхшы тәрбиячесе дип Лениногорскиның 10нчы балалар бакчасында эшләүче тәрбияче Виктория Цыганова билгеләнде. Һөнәри осталыкта иң яхшысы исемен алу өчен көрәш 17 мартта башланды. Өч көнлек ярышның нәтиҗәсе безнең районга уңыш китерде!

Виктория Цыганованың тәрбияче булып эшләү стажы 9 ел тәшкил итә. Яшь, энергияле Виктория балалар белән уртак тел таба белә.  Лениногорск музыка-рәсем сәнгате педагогика колледжында “Мәктәпкәчә белем бирү” белгечлеге буенча укый, аннары  Казан инновация институтында психология факультетында укып, махсус дефектологик белем ала. Тәрбияче булып бар күңелен биреп эшли , диләр аның турында.

Ни өчен балалар бакчасында эшләү ошый дигәнгә,  “Мин  рәссам да, артист та, тарихчы да, капитан, экскурсовод, буяучы, инспектор да...  Мин – барысын да белүче, барысына да өйрәтүче тәрбияче, мин – балаларның дусты да, шул ук вакытта авыр минутларда ярдәмгә килә орган  якын кеше дә. Бераз гына үзеңне дә бала итеп тоеп,  балалар дөньясын, аларның беркатлы булуын күрә белү мөһим. Ә алар белән бергә чын күңелдән шатланып, бергәләп шаяру, уйлый белү тагында мөһим”, - ди Виктория Цыганова.

Хәзер безнең тәрбиячегә һөнәри осталык конкурсының Россия этабында Татарстан данын якларга туры киләчәк.

Виктория Владимировна 2021 елда Сочида “Россиянең ел тәрбиячесе” Бөтенроссия бәйгесендә 83 катнашучы арасыннан иң яхшы 15 тәрбияче исемлегенә кергән иде.

фотолар: 10нчы бакчаның социаль челтәрдәге битеннән