Мөнир Рахмаев: «Мин ике ут арасында янам»

– Мөнәсәбәтләрне җайларга тырышасызмы соң?
– Тырышып карадык, ләкин әни белән килешеп бетә алмыйбыз. Кызыбызны тугач күргәннәр иде. Ә Асмирага инде 4 яшь тулды. Әти-әнинең дә яшьләре бара, икенче елга әтинең юбилее да әле. Илсөярнең әти-әниләре белән күрешеп, аралашып торабыз. Әти-әниләр белән мөнәсәбәтләр гаилә коргач начар якка үзгәрде. Бу хәл яңалык түгел инде. Элек тә кызлар белән очраша башлагач, әни: “Син безне яратмыйсың, безне оныттың”, – дия иде. Кызлар белән мөнәсәбәтләрне туктаткач, барысы да үз урынына кайтты.

– Сез ялгыз яшәргә тиеш идегезмени?
– Гаилә кордым, тик әти-әниләр моңа шат түгел. Ни кызганыч, Мөнир Рәшитович, аларның уллары, ярдәм иткән очракта гына яхшы булып кала ала. Әти-әнигә игътибарны киметсәм, шунда ук бәхәс башлана. Бәлки, хәзер аларның яше шундыйдыр. Әти-әнине хөрмәт итәм, әлбәттә. Туган нигезгә буш кул белән кайтканым юк, телефоннарына акча салып торырга да тырышам. Тик хәзер инде үземнең гаилә бар икәнен дә аңларга кирәк. Кодагыйлар да бер-берсе белән аралашмый. Мин ике ут арасында янам. Эшкә китеп бераз онытылам, тик бу бәхәсләрне искә алгач, кәеф төшә. Хатыным, балам белән авылга кайтып, әти-әниләр белән бер өстәлгә янына утырып, сөйләшәсе, кунак буласы килә. Әлегә бу проблеманы хәл итеп бетерә алмыйбыз. Хәзер инде Илсөяр дә аралашырга теләми, әни аңа да нинди генә сүзләр язып бетермәде. 

– Тормыш иптәшегезне социаль челтәрләрдә дә бик яманлыйлар. Сез моңа нинди мөнәсәбәттә?
– Бездә көнче кешеләр бик күп. Хәтта дус дип атап, бергә вакыт үткәрердәй кешем дә юк. Дусларыңның кем икәнен белергә теләсәң, әҗәткә акча бир диләр. Күп тапкыр акча биргән дә булды. Моның да ахыры хәерле булмады. Вакыт тормышта дуслар булмавын исбатлады. Иң якын кешем – тормыш иптәшем. Әйе, хәзер косметологик процедуралар бик популяр. Тормыш иптәшемнең иреннәре ясатылган, тешләргә винир куйдык, фитнеска йөри, үзен карый. Күкрәкләрен дә ясатырга телибез. Без бик “стильный” гаилә дип уйлыйм. Икебез дә матур булырга, имиджны сакларга тырышабыз. Илсөярне, гаилә корганда ук, безнең турында төрле сүзләр язачаклар, дип кисәтеп куйдым. Ул яман сүзләр язучыларга игътибар итми. Тормыш иптәшемне бик хөрмәт итәм. Бер тапкыр аны гомерлеккә югалта да яздым.

– Нәрсә булды соң?
 – Мин гастрольләргә киткән идем. Бу хәлне ул миннән яшерде, соңыннан гына белдем. Тормыш иптәшемнең бала табар вакыты килеп җитә иде. Ул бертуктаусыз коса башлаган, табиблар да сәбәбен ачыклый алмаган. Илсөяр бернинди операциясез, үзе бала тапты. Кызыбыз дөньяга килгәч, хәле җиңеләер дип уйлаган. Ә монда, киресенчә, Илсөяр сүрелә барган. Аның сукыр эчәгесе шартлаган булып чыкты. Табиблар ашыгыч рәвештә операция ясарга керешкәннәр. Эчке органнарын юдырырга, чистартырга туры килгән. Илсөярнең язмышы җептә эленеп торган. Кызыбызны да балалар хастаханәсенә алып киткәннәр, аңа да зыян килгән булган. Менә хәзер дә икенче, өченче бала алып кайтырга телибез, тик килеп чыкмый. Икебезнең дә анализларыбыз яхшы. Моңа Илсөяргә ашыгыч ясалган операция сәбәпчедер. “Кайчан тагын бала алып кайтасыз инде?” – диләр. Бик телибез, тик... 

– Ни өчен безнең халык пластика ясаган кызларны кабул итә алмый икән?
– Күпләр кешене белмичә, аның турында нәтиҗә ясый, нинди генә начар сүзләр язмый. Игътибар итсәгез, күп кенә җырчылар тормыш иптәшләренә пластика ясатмый, чөнки халыкка якынрак буласылары килә. Кайберләре хатынны үзгәртә алмагач, хыянәт итә. Тормыштан тәм табып, рәхәтләнеп яшәргә кирәк. Әгәр мөмкинлегең бар икән, нишләп ясатмаска соң? Тормыш иптәшемнең фотолары астында “ямьсез” дип язып комментарийлар калдыручы ир-атлар да ник үзләренең хатыннарына гына карап утырмый соң? Телисең икән, ясат. Һәркемнең тормышы үз кулында бит. Барысына да ярап бетеп булмый инде. 

– Винера Ганиева белән дуэт җырлап та күтәрелеп киткән идегез. Сезнең турында ул вакытта да имеш-мимешләр күп булды. Хәзер аралашасызмы?
– “Ак каен” җырын мин балачактан җырлап үстем. Винера Ганиева да аны башкарган икән. Без бер-беребезгә ярдәм иттек дип уйлыйм. Әлбәттә, бу җырдан соң мин күтәрелеп киттем, ә Винера Ахатовна үзенең популярлыгын исбатлады. Безнең арада бары эшлекле мөнәсәбәтләр генә иде. Институтта укыган чакларда аралаштык. Хәзер исә безнең юллар аерылды, кызганыч. Мәрхүмә Хәмдүнә апа Тимергалиева белән дә тагын җырлар яздырырга теләгән идек. Тик язмышка каршы килеп булмый. 

– Кызлар белән дә күп очрашканыгызны ачык әйтәсез. Тормыш иптәшегез сезне ничек үзенеке итте?
– Илсөяр минем өчен хатын-кыз идеалы. Хатыным тәмле итеп ашарга пешерергә, миллион долларга күренергә тиеш. Илсөяр бу таләпләргә туры килә. Яңа гына гаилә корган парларга бер-берсен аңлар өчен вакыт кирәк диләр. Ә без Илсөяр белән бер-беребезне беренче күрешүдән үк бер караштан аңлый башладык. Илсөяр кызу холкымны да бераз тыя белә. Шул ук вакытта үзенең фикерен дә әйтә. Фикере булмаган хатын-кыз белән яшәү бертөрле булыр иде. Минемчә, мөнәсәбәтләр һәрвакыт кайнап торырга тиеш. Без тормышка елмаеп яшибез. Гомер бер тапкыр гына бирелә, шуңа күрә аның тәмен тоярга тырышабыз. Кайчак кәефне күтәрер өчен икәү шопингка, массажга барабыз. Бергә вакыт үткәрергә яратабыз.

– Илсөяр нинди әни?
– Бала өчен яхшы – әни, минем өчен яхшы – хатын. Илсөяр күп вакытын кызыбызга багышлый. Ул бик юаш һәм шул ук вакытта таләпчән дә була белә. Мин аның белән бик канәгать, язмышыма рәхмәтлемен. Кызыма да, Илсөяргә дә чәчәкләр бүләк итеп торам. Миңа булган мәхәббәтләре, хөрмәтләре өчен рәхмәт әйтәсем килә. 

– Өйдә сез нинди кеше?
– Сәхнәдәге Мөнир белән өйдәге Мөнир икесе ике төрле кеше. Мәҗлесләрдән соң еш кына тынычлыкта калырга яратам. Бу вакытта мине тормыш иптәшем дә, кызым да борчымый. 

– Сезнең өчен акчага сатып ала алмый торган әйбер нәрсә?
– Ышаныч һәм сәламәтлек. Кешенең ышанычын яулап алу кыен. Тормыш иптәшемнең ышанычын югалтырга куркам. Бу хәл килеп чыкмасын өчен бер-беребездән берни дә яшермибез. Тормыш иптәшем сәламәтлегемне дә кайгырта. Дөрес һәм тәмле туклану ярдәмендә 4 килограммга ябыктым да әле. Гаилә тормышы мине яхшы якка үзгәртте.

– Соңгы тапкыр кайчан еладыгыз?
– Машинада барганда Сәгыйть Гыйбашевның “Әниемнең туган көне бүген” җырын ишеткәч күзләрем яшьләнде. Гаиләләребез аралашмавы искә төште... Әтинең юбилеена бергә җыелырга иде инде. Алар да яшәрми бит. 

"Ш.К."