Кредит – файдага гына

Авыл җирендә яшим, эшлим дигән кешегә ярдәм йөзеннән, төрле программалар каралган. Башыңны эшләт тә, кәгазь-белешмәләр артыннан йөрергә иренмичә зур теләк белән алын гына. Шуның берсе - 2006 елдан башланган шәхси хуҗалыкларны үстерүгә кредит бирү. Шул елдан алып, 1 декабрьгә кадәр Лениногорск шәһәре һәм районы буенча барлыгы 140 миллионнан артык сумга кредит алынган. Ә быелгы елның 1 декабренә 39 миллионга якын 226 кредит бирелгән. Кайсы авыл җирлеге күпме кредит алганлыгы турында Авыл хуҗалыгы һәм азык-төлек идарәсе биргән мәгълүмат-таблицада барысы да күрсәтелгән.

Беренче баганада - авыл җирлекләре исеме, икенчедә - шәхси хуҗалыклар саны, өченчедә - алынган кредит саны, дүртенчедә - кредитның суммасы (мең сумнарда күрсәтелгән. Мәгълүматлар 1 декабрьгә).

Әлеге акчалар нәрсәгә тотылган соң? Барлыгы 117 баш сыер алынган, монда шулай ук башмак таналар һәм 18 айдан зур булган бозаулар керә. Шул исәптән, Куакбаш авыл җирлеге 25 баш сыер алуга файдаланган, Кирлегәч - 16, Писмән авыл җирлеге 12 баш, ә Урмышлы белән Шөгер унышар баш сыер алуга тоткан.

Туктар-Урдалы авыл җирлеге 15 баш яшь терлек алган. Искешөгерлеләр 100 баш кош-корт булдырып, барлык авыл җирлекләрен дә уздырып киткәннәр. Куакбаш авылы терлекләр белән генә чикләнмичә, 34 умарта корты оясына баеткан, башкаларга караганда алар иң күп кредит алучы. Сугышлылар да кимен куймаган - 30 , ә Ивановка авыл җирлегендә 27 оя булдырылган. Барлыгы 86 баш сарык һәм кәҗә алынган. Авыл хуҗалыгы машиналары һәм җиһазларын иң күп алучылар Иске Шөгер (32 берәмлек), Сугышлы (21), Шөгер (16) авыл җирлекләре. Барлык кредитның 70 данәсе мал-туар өчен бина төзү һәм ремонтлауга тотылган.

Күргәнегезчә, авыл кешесе тырыша-тырмаша. Үз хуҗалыгын саклап, үстереп калу ягында тора ул.