Организмга йод җитмәү нәрсәсе белән куркыныч? Табиб аңлата

– Организмда йодка кытлык ни сәбәпле барлыкка килә?

– Без йодка кытлык зур булган төбәктә яшибез. Аңа кытлык, нигездә, туфрактагы йод күләме аз булу аркасында пәйда була. Туфракта җитешмәгәч, анда үскән үсемлекләрдә, бөртекле культураларда да аның күләме аз була. Диета тоту белән мавыккан кешеләрнең организмына да еш кына йод җитми. Гипертониядән интеккән кешеләргә көн дәвамында ашалган тоз күләмен чикләргә кушалар. Бу исә, үз чиратында, шулай ук йодка кытлык китереп чыгара. Ник дигәндә, тоз – иң төп йод чыганакларының берсе.

– Йодка кытлык кичергәндә, нинди билгеләр күзәтелә?

– Йод безнең организмга бик кирәк. Ул җитмәгәндә, кешедә билгеле бер чирләр дә килеп чыгарга мөмкин. Йод иң беренче чиратта калкансыман биз көйле эшләсен өчен кирәк. Шуңа күрә организмга әлеге матдә җитмәгәндә, кешедә иң беренче чиратта калкансыман биз авырулары пәйда була. Бигрәк тә гипотериоз очраклары еш очрый. Ул кешенең акыл сәләтенә зыян сала, матдәләр алмашын боза, психикасына тискәре йогынты ясый. Кеше чәч коелудан, тән тиресе бозылудан, эч катудан интегә, күңел төшенкелегенә бирелә. Баланың үсеше дә тоткарланырга мөмкин. Организмга йод җитмәү нәселсезлеккә дә китерә. Шулай ук йод яман шешне дә кисәтә.

– Организмда йодның нормадан артып китүе нәрсәсе белән куркыныч?

– Йодның җитмәве генә түгел, аның артып китүе дә калкансыман биз авыруларына китерә ала. Йодның артып китүе аркасында, иң беренче булып, калкансыман биз зураерга (зоб башланырга) мөмкин.

– Йод җитмәүне башка чирләрдән ничек аерырга?

– Калкансыман биз белән йод – аерылгысыз төшенчәләр, дигән ышану яши. Чынлыкта аның 2/3 өлеше генә шунда туплана. Йодның калган өлеше төкерек, күкрәк бизләрендә, ашказанының лайлалы тышчасында, йөкле хатыннарның плацентасында саклана. Организмга йод җитешмәгәндә, шул әгъзалар авырулары да пәйда була. Сүз уңаеннан, күкрәк сөтендә йод күләме калкансыман биз тукымаларындагы белән чагыштырганда дүрт тапкыр күбрәк! Калкансыман биз авырулары белән күкрәк яман шеше билгеләре охшаш.

– Кытлык булмасын өчен, ничек тукланырга кирәк?

– Моның өчен, иң беренче чиратта, ашарга әзерләгәндә составында йод булган тоз кулланырга кирәк. Диңгез тозы, креветка, балык кебек диңгез ризыкларына да өстенлек бирергә кирәк. Алар диңгез суындагы йодны үзләренә сеңдерә.

– Тоз составындагы йод озак сакланмый, ашарга әзерләгәндә очып бетә, дигән фикер яши. Бу сүзләрдә хаклык бармы?

– Йод, дөрестән дә, очучан. Азык-төлекне термик эшкәрткәндә бик тиз югала ул. Төгәлрәк әйтсәк, ашарга пешергәндә салынган тоздагы йодның 80 проценты очып бетә. Шуңа күрә аны ризыкка пешеп чыгар алдыннан гына салу хәерле. Тозны дөрес итеп сакларга да кирәк. Ул ябык савытта торырга тиеш.

– Тукланудан тыш, йодка кытлыкны ниндидер дарулар эчеп тә булдырмый калырга мөмкинме?

– Әйе, бигрәк тә йөкле, бала имезүче хатын-кызларга, балаларга йод запасын шул рәвешле тулыландырырга киңәш ителә. Бүген сатуда организмны йодка баетучы махсус дурулар да, әлеге матдәгә бай үсемлекләрдән ясалган препаратлар да бар. Дөрес соңгыларында йод күләме стандарт белән билгеләнми. Нәтиҗәдә, алар аша организмга күпме йод эләккәнен дә чамалап бетерергә мөмкин түгел. Шуңа күрә аларны эчкәндә бик сак булырга кирәк.

Динә Гыйлаҗиева

"Ватаным Татарстан" сайтыннан

Фото: Рамия Гарифуллина