Лениногорск районы кырларында язгы чәчү бара

Әлегә һава торышы уңай торганда, орлыкларны җиргә кертеп, калдырырга, чәчүне тиз срокларда башкарырга тырышалар.

Авыл хуҗалыгы идарәсеннән алынган мәгълүматка караганда, 24 апрель көненә 6 мең 452 гектарда чәчелгән, ягъни эшләр 15 процентта  башкарылган.

Быел районда язгы культураларны 44 мең гектарга якын мәйданда чәчәргә планлаштыралар. Язгы чәчүдә «Август-Лениногорск» һәм  «Маркс» хезмәтчәннәре аеруча тырышлык күрсәтә.

Шул ук вакытта уҗымнарны тукландыру 6 мең гектарга якын башкарылган, шушы көннәрдә уҗым тукландыру эше тәмамланачак. Күпьеллык үләннәрне тукландыру 2 мең 297 гектарда, уҗымнарны тырмалау 5 мең 285 гектарда башкарылган. Тракторлар гөрелтесе тынмый.

Авыл хуҗалыгы предприятиеләре чәчү вакытында минераль ашламасыз уңыш мул булмаганын белеп, ашлама туплауны дәвам итәләр. Хуҗалыклар тарафыннан барлыгы 12027 тонна минераль ашлама алынган, 1 гектар чәчүлек җиренә 100 килограмм тәэсир итү көчендә булган ашлама туры килә.

“Хәзерге вакытта иң мөһиме – язгы кыр эшләрен сыйфатлы итеп, оешкан төстә, исән-сау башкарып чыгу” – ди авыл хуҗалыгы идарәсе начальнигы Илнур Шәмарданов.

фото: Салават Камалетдинов