“Әлмәт каскадеры” Лениногорск полиция бүлегенең изоляторында тоткынлыкта булачак

Тойота Хайландер автомобиле белән идарә итүче 19 яшьлек әлмәтле үзен очар коштай хис иткән, күрәсең.

Ул Лениногорскиның Чайковский урамыннан  шундый көчле тизлектә килгән: үзенең юлдан каршы якка очып чыгып, юл кырыенда торган бер оешманың биләмәләренә ничек барып кергәнен дә сизми калган. Аның “очыш траекториясен” каршы яктагы предприятиеләрнең берсенә куелган видеокамера төшереп калган.

Әлмәт кешесе үзе зыян күрмәгән, ә менә чит ил машинасын төзәтеп, янә йөри алырлык хәлгә китерү мөмкин түгел. Өстәвенә машина “Әлмәт каскадерының” үзенеке дә булмаган.  Машинаның ачкычын ул әнисеннән урлап алган. Әни кеше, әлбәттә, газиз баласыннан машина кызганмаган булыр иде, әгәр дә егетнең машина йөртү  таныклыгы булса. Кызганыч, әле ул укып-таныклык алырга өлгермәгән булган. 

 Суд хокук бозучыны гаепле дип тапты,  егет 10 тәүлек Лениногорск полиция бүлегенең  вакытлыча тоту изоляторында административ тоткынлыкта булачак.

Исламия Галимова.