Райондагы ФАП мөдиренә карата ачылган җинаять эшенә нокта куелды

Лениногорск районындагы фельдшер-акушерлык пункты мөдире антиваксерларга, ягъни коронавируска каршы прививка ясатырга теләмәгән кешеләргә сертификатлар саткан. Әлеге факт буенча җинаять эше кузгатылган иде. Бу хакта сайтта хәбәр иткән идек.

23 яшьлек Шөгер табиблык амбулаториясе фельдшерлык-акушерлык пункты мөдиренә карата кузгатылган җинаять эшенә шушы көннәрдә нокта куелды.

Ул COVID-19 каршы вакцинация сертификатлары саткан. Биш “клиентка” шулай эшләп биргән. Тикшерү версиясе буенча, әлеге “клиентлар” прививка ясатмыйча гына сертификатлы булырга теләгәннәр.

ФАП мөдире федераль регистрга ялган мәгълүматлар керткән һәм “клиентлар” үз чиратында сертификатлы, QR-кодлы булганнар. Әлеге эшләре өчен  мөдир 5 клиенттан барлыгы 25 мең сумнан артык акча алган. 

Хезмәткәрне  “Ришвәт алу” маддәсе , “Вазыйфаи вәкаләтләрдән файдалану” маддәсе,  “Хезмәттә алдау” маддәсе буенча гаеплиләр. ФАП мөдире үзенең гаебен таныган.

фото: https://pixabay.com/ru

http://leninogorsk-rt.ru/news/sobytie-nedeli/zaveduyushchaya-akusherskim-punktom-v-leninogorske-zarabotala-25-tysyach-rubley-na-prodazhakh-sertifikatov-antivakseram