Казанда булган фаҗигагә бәйле рәвештә, татарстанлыларга газ җиһазларыннан куркынычсыз файдалануның кагыйдәләрен искә төшерделәр

Татарстанның газ хезмәтләре халыкка газ приборларыннан файдаланганда куркынычсызлык кагыйдәләрен төгәл үтәргә кирәклеген искәртә.

 Исегезгә төшерәбез, Казанның Себер трактында ирле-хатынлы ике кеше һәлак булган. Болар – 53 яшьлек ир-ат һәм 52 яшьлек хатын-кыз. Фаҗиганең башлангыч сәбәбе – сөрем газыннан агулану.

«Газпром трансгаз Казан» белгечләре ассызыклаганча, биналарны даими җилләтү, төзек вентиляция, җиһазларга вакытында хезмәт күрсәтү һәм теләсә нинди үз белдегең белән башкарган эшләрдән баш тарту – фаҗигане булдырмау өчен төп шартлар.

Газ исе килеп чыкканда белгечләр  киңәш итә:

 газ приборларыннан файдалануны кичекмәстән туктатыгыз;
 газ бирүне туктатыгыз;
 бинаны җилләтү өчен тәрәзәләрне һәм форточкаларны ачыгыз;
 электр приборларыннан файдаланмагыз;
 бинадан чыгып китегез;
 авария хәлендәге газ хезмәтен 104 телефоны буенча яки ашыгыч хезмәтләрне чакыруның бердәм номеры – 112 буенча  чакырыгыз һәм авария хәлендәге газ хезмәте диспетчеры күрсәтмәләрен үтәгез.