Татарстанда ел башыннан авылда яшәүче 1 мең ярымнан артык хатын-кыз акчалата ярдәм алган

Татарстанда авылда кимендә өч ел яшәүче хатын-кызларга бала туганда бер тапкыр бирелә торган түләү бирелә. 

Авылда яшәүче яшь хатын-кыз беренче баласын 25 яшькә кадәр тапса, ул 50 мең сум күләмендә түләү алырга хокуклы. Әгәр 29 яшькә кадәр хатын-кыз өченче яки аннан соңгы баласын тапса, бер тапкыр бирелә торган түләү күләме 100 мең сумга кадәр арта.

Татарстан Республикасы Хезмәт, халыкны эш белән тәэмин итү һәм социаль яклау министрлыгында хәбәр итүләренчә, 2025 ел башыннан түләүләр республикада яшәүче 1 529 хатын-кызга билгеләнгән. 

Исегезгә төшерәбез,  республикадагы әлеге социаль ярдәм чарасы «Гаилә» илкүләм проекты кысаларында гамәлгә ашырыла һәм яшь әниләргә, үз керемнәренең дәрәҗәсен яки мөлкәти хәлен расламыйча, өстәмә финанс ярдәме алырга мөмкинлек бирә.