Лениногорскилылар пластик пенсия таныклыгы ала

Ел башыннан 980 лениногорскилы пластик пенсия таныклыгы алган. Бу хакта Социаль фондның Лениногорск Клиентлар хезмәте хәбәр итә.

Әлеге таныклык пенсионер статусын раслый һәм ташламаларга хокук бирә.  Анда фото, фамилия, исеме, әтисенең исеме бар, СНИЛС, билгеләнгән пенсиянең төре һәм срогы бар. Әгәр сез 2 төрле пенсия алсагыз, һәркайсы турында белешмәләр таныклыкта булачак.

Шунысы да бар: иске пенсия таныклыклары гамәлдә калачак.

Пластик төрдәге яңа пенсия таныклыгын ничек алырга ? Моның өчен Социаль фондның Клиент хезмәтенә мөрәҗәгать итәргә. 2х3 зурлыгындагы 2 фото тапшырырга. Паспорт мәгълүматлары кирәк булачак.

Таныклык мөрәҗәгать иткән көндә  үк ясала.