Лениногорскидагы аграр предприятиедә тиресне ашлама буларак кулланалар

Бүгенге көндә район аграр предприятиеләре тарафыннан 3 мең 62 тонна минераль ашлама тупланган. Хәзерге вакытта бер гектар чәчүлек җиренә 28,9 килограмм тәэсир итү көчендә булган ашлама туры килә.

Дөрес, минераль ашламаларга бәяләр бик югары. Районның “Август-Лениногорск” җәмгыятендә чыгымсызрак ысул эзлиләр. Алар тиресне кырга чыгара. Ә тирес  хуҗалыкның фермаларыннан чыгарыла, тирес җитәрлек, 1 мең 750 баш мөгезле эре терлек исәпләнә бит монда.
Тирес, билгеле булганча, уңышны арттыра, төгәл файдаланганда  кертелә торган ашламалар күләменә ихтыяҗ кими, диләр хуҗалыкта.

Хуҗалыкта тиресне махсус тирес таратучы арба-техника алганнан соң куллана башладылар. Фермаларда берничә ел яткан тирес хәзер кырга чыгарыла, әлеге  кырда киләсе сезонга кукуруз чәчәргә планлаштыралар. Аграр хуҗалык хезмәтчәннәре кар яуганчы кырга ярты ай эчендә 8 мең тоннадан артык тирес матдәсе чыгарып өлгерделәр.