Сыер савучы Гөлнур Төхбәтова: 16 яшьтән фермага киттем

Татарстан Министрлар Кабинетының Рәхмәт хаты белән “Маркс” хуҗалыгының  (Куакбаш) сыер савучысы Гөлнур Төхбәтова бүләкләнде. Менә 27 ел дәвамында сөт җитештерүгә зур өлеш кертә.

“Минем әни сыер савучы булып эшләде. 16 яшьтә мин дә фермага сыер саварга килдем. Хәзер эш шартлары да яхшырды, үзебез дә остардык. Эшемнән канәгать, яратып башкарам. Җитәкчебез Ильяс Ганиев та әйбәт, ярдәм итә. Хезмәт хакы вакытында түләнә. Ирем Өлфәт белән бергә эшлибез. Сабантуйда шундый зур бүләкләүдә катнашуы күңелле, әлбәттә. Хезмәтне бәяләүләре өчен рәхмәт”, - ди Гөлнур ханым. Алга таба тагын да зуррак исемнәр алырга язсын, колхоз бетмәсен, ди.

Өч бала әнисе эштә дә, өйдә тырыш ханым. Ире Өлфәт белән 25 ел бергә гомер итәләр.

Розалия Мостафина фотосы