Лениногорскиның Туган якны өйрәнү музее Хәтер диварын тулыландыруын дәвам итә

Лениногорскиның Туган якны өйрәнү музее Хәтер дивары өчен ветераннарның фотоларын җыюын дәвам итә.

Март ахырына кадәр музейда "Есть такая профессия - Родину защищать" ( "Шундый һөнәр бар - Ватанны якларга") күргәзмәсе эшли, анда төрле чорларның һәм төрле гаскәрләрнең хәрби формасы тәкъдим ителгән, дип хәбәр итә музей хезмәткәре Айгөл Рәхимова.

Әлеге күргәзмәнең бер өлеше итеп Хәтер дивары ясалган, анда шәһәр һәм районның һәр кешесе үз ветеранының фотосын өсти ала. 

Музей хезмәткәрләре фотоларны шактый туплагач, 9 майга зур баннер ясарга өметләнәләр. 

Бөек Ватан сугышында катнашучыларның җыелган барлык мәгълүматлары музейның электрон Хәтер китабына кертеләчәк һәм музей сайтында махсус бүлектә урнаштырылачак.