Бәкер шифаханәсендә волейбол Кубогына турнир үтте

Бәкер шифаханәсендә 11 нче июльдән алып 22 нче июльгә кадәр, санаторий Кубогына волейбол буенча турнир узды. Турнирда хатын-кызлар командалары да, ир-егетләр командалары да бик әзерлекле булып, җиңүгә рухланып катнашты.

10 көн дәвамында  хатын-кызлардан торган алты һәм  ир-егетләрнең өч командасы тиңдәшсез волейбол көрәшендә көч сынашты. Ярышларда административ-идарә корпусы, дәвалау-сәламәтләндерү комплексы, ләм белән дәвалау корпусы, номерлар фонды һәм азык-төлек блогы хезмәткәрләре катнашты.

Командалар көч һәм спорт әзрлеге ягыннан, билгеле,  төрле иде, әмма шулай булуга карамастан алар  һәр туп өчен “теш-тырнаклары” белән уйнадылар, җанатарларны да шактый гына борчулы мизгелләр кичерергә мәҗбүр иттеләр. Турнирның дустанә атмосферасына карамастан, мәйданчыкта сәламәт көндәшлек рухы хөкем сөрде - беркем дә бирешергә теләмәде һәм һәр уен үзенчә кызыклы, көтелмәгәнчә эмоцияләргә бик бай булды.

“Санаторий хезмәткәрләре өчен спорт- аз гына вакытка булса да эштән арынып тору, үз сәламәтлекләрен ныгыту. Аннан килеп, спорт ул  коллектив  белән бергә, бердәм карар кабул итәргә өйрәнү мөмкинлеге дә бит”, - дип, билгеләп үтте шифаханә директоры Наил Шәйхетдинов турнирда катнашучыларны сәламләү сүзендә.

Волейбол-спортның команда төре, ярышларның уңышлы нәтиҗәсе- аның барлык әгъзаларының тырышлыгы нәтиҗәсе ул.  Турнир дәвамында уенчылар сугышчан рухта булдылар һәм бердәмлек һәм җиңүгә омтылыш күрсәттеләр.

Ә бу волейбол ярышларының нәтиҗәсе буенча, хатын – кызлар арасында күчмә кубокка -азык-төлек блогы командасы, ир-атлар арасында административ-идарә корпусы командасы ия булды.

Калган урыннар түбәндәгечә бүленде:

- ир-атлар арасында 2 нче урын-массажчылар командасында,  ә 3 нче  призлы урынны  шифаханәнең ветераннары яулады,

-хатын-кызлар арасында 2 нче урын – административ-идарә корпусы командасында, 3 нче урынга-номер фонды командасы ия булды.  Җиңүчеләр һәм призерлар истәлекле медальләр һәм призлар белән бүләкләнде.

https://vk.com/bakirovo33 фотосы