Инвалидларны тәрбияләгән өчен нинди түләүләр каралган?

Беренче төркем инвалидны тәрбияләүче эшләмәүче татарстанлылар ай саен 1,2 мең сум күләмендә компенсация түләве рәсмиләштерә ала. Бу хакта «Татар-информ» агентлыгына Россия Пенсия фондының Татарстан буенча бүлеге идарәчесе Эдуард Вафин хәбәр итте.

«Балачактан инвалидлардан кала беренче төркем инвалидларын тәрбияләүче эшләмәүче татарстанлылар өчен, бергә яшәүләренә һәм инвалидның гаилә әгъзасы булу-булмавына карамастан, ай саен компенсация түләү билгеләнә. Бу түләү күләме 1,2 мең сум тәшкил итә. Түләү инвалидка билгеләнгән пенсия белән бергә башкарыла», - диде ул.

Ата-аналарга яки уллыкка алучыларга, опекуннарга, попечительләргә һәм 18 яшькә кадәрге инвалид балаларын яки беренче төркем инвалидларны караучы башка кешеләргә айлык түләү каралган. Аның күләме ата-аналар һәм опекуннар өчен 10 мең сум, ә инвалидларны караучы башка гражданнар өчен 1,2 мең сум тәшкил итә.

«Компенсация яисә айлык түләү гражданның аны билгеләү өчен гариза һәм барлык кирәкле документлар белән мөрәҗәгать иткән айдан алып билгеләнә. Тәрбияләү чоры һәр ел өчен 1,8 пенсия коэффициенты күләмендә иминият стажына исәпләнә. Бу кешеләргә иминият пенсиясен алу өчен үзләренең пенсия хокукларын формалаштырырга мөмкинлек бирә», — дип аныкладылар Россия Пенсия фондының Татарстан буенча бүлеге матбугат хезмәтендә.

Компенсация һәм айлык түләү инвалидны тәрбияләү чорына билгеләнә. Пенсионерлар һәм эшсезлек буенча пособие алган кешеләр компенсация һәм айлык түләү хокукына ия түгел. Ике түләү дә инвалидка билгеләнгән пенсия белән бергә башкарыла.

http://shahrikazan.ru/news/kyiskacha-ya%D2%A3alyiklar/invalidlarny-trbiyal-chen-nindi-tllr-karalgan

https://photo.tatar-inform.ru/