Лениногорск прокуратурасы куркынычсызлык таләпләренә туры килми торган хезмәт күрсәтүдә шикләнелүче шәхси эшмәкәр эшен карый

Әлеге эш буенча тикшерү нәтиҗәсе күрсәткәнчә, моннан бераз вакыт элек 37 яшьлек Бөгелмәдә яшәүче хатын-кыз, Лениногорскиның Шашин проспектында балалар өчен уен-күңел ачу үзәге ачкан. 

Әмма бирегә балалар өчен куелган“коры бассейн” куркынычсызлык таләпләренә туры килмәгән. Бассейнның кырые 97 сантиметрдан да кимрәк булмаган бортлар белән әйләндереп алынырга, ә астына баланы бәрелү-имгәнүдән саклаучы җәймә-матрас җәелергә тиеш булган. Тикшерү күрсәтүенчә, бассейнның бортлары бөтенләй булмаган, ә җәймә-матрас куркынычсызлык таләпләренә туры килмәгән, ул шактый юка булган. 

Әлеге таләпләрне бозу 2024 елның 4 маенда фаҗига китереп чыгарган. Әнисе белән уен үзәгенә килгән 3 яше тулмаган бала бассейн кырыеннан идәнгә егылган. Егылу нәтиҗәсендә баланың  баш арты сөяге сынган һәм баш мие имгәнгән, аның сәламәтлегенә авыр зыян килгән.  

Эшмәкәр хатын-кыз  Россия Федерациясе  Җинаять Кодексы 238 маддәсенең 2 өлешендәге «б» һәм «в» пунктлары буенча гаепләнә. Җинаять Кодексының бу маддәсе куркынычсызлык таләпләренә җавап бирми торган хезмәтләр күрсәткән өчен җәза билгели. Гаепләнүче хатын-кыз үз гаебен танымаган. 

Җинаять эше Лениногорск шәһәр судына җибәрелгән. Бу эшнең нәтиҗәләренә соңрак әйләнеп кайтырбыз, барыбыз да баланың сәламәтләнүен телибез.