Лениногорск районында «Татар аты» Бөтенроссия фестивалендә Башкортстан һәм Казахстан спортчылары катнашуы көтелә

Чара 24 августта Лениногорск районы Югары Каран авылында, «Алмакай» ат утары территориясендә узачак. Ярышларның бүләк фонды 678 мең сум тәшкил итә.

Татар токымлы атлар чабашы, «Тай-тулак» –  кыргый атларны йөрергә өйрәтү команда ярышы, «Аударыш» – ат өстендә көрәш, «Тәңкә алу» – ат чабышы вакытында тәңкә күтәрү ярышы, «Мәргән укчы» – атта утырган килеш уктан ату ярышы, «Улак» яки «Кок-бор» уены төп вакыйгалар булачак.

«Фестивальдә икенче республика рингы - татар токымлы атлар йөреше узачак. Токым буенча ике яшь, өч яшь һәм аннан өлкәнрәк булган бияләр һәм айгырлар арасында иң яхшылары билгеләнәчәк», - дип сөйләде «Татар-инфор»га  Атларда көрәш буенча халыкара федерация вице-президенты, Россиянең Кок-бор һәм милли спорт төрләре берлеге вице-президенты, атлар үрчетүче Фәрит Нәбиуллин.

Аның сүзләренчә, ярышларда Башкортстан һәм Казахстан спортчылары катнашырга җыена.

«Әлеге фестивальнең максаты - яшьләргә патриотик тәрбия бирү. Яшь буын үз тамырларын, тарихын, милли мәдәниятен белергә тиеш. Хәзер балалар физкультурага аз игътибар бирә. Күбрәк компьютерлар артында утыралар, без аларның игътибарын башкага юнәлтергә телибез. Гомумән алганда, чара халык арасында патриотик рухны күтәрүгә юнәлдерелгән, бигрәк тә махсус хәрби операция шартларында», – диде Фәрит Нәбиуллин.

Фестиваль сәгать 11дә ачыла. Чабышларда һәм «Аударыш»та катнашучыларны теркәү иртәнге сәгать 7дән 9га кадәр дәвам итә.

Фото: © «Татар-информ», Владимир Васильев