Лениногорск халыкка социаль хезмәт күрсәтү үзәгендә Гаилә елы уңаеннан гаиләне котладылар

 Гаилә елы кысаларында һәм якынлашып килүче  Гаилә көне алдыннан Лениногорскиның «Исток-башлангыч» социаль хезмәт күрсәтү үзәгенең өйдә социаль хезмәт күрсәтү бүлеге белгечләре социаль хезмәтләр алучы Закир абый  һәм Хәтимә апа гаиләсендә булдылар, котладылар.

Әлеге пар 47 ел бергә гомер итә.  Бердәм,  кунакчыл кешеләр. Өч бала үстергәннәр, биш оныклары бар.

Хәтимә апа уңган-булган, бәйләү белән мавыга. Закир бабай гомер буе югары вольтлы линияләрдә электрчы булып эшләгән.

Алар Закир абыйның энесен армиягә озату кичәсендә танышканнар. Аннары Закир абый Хәтимә апаны йә кинога, йә биюгә чакырган, ләкин кыз риза булмаган. Ләкин Закир абый үз сүзендә нык торган һәм ошаткан кызны барыбер үзенә караткан.

- Тормышта төрлесе була. Иң мөһиме, теләсә нинди авырлыкларны тыныч, лаеклы итеп кабул итәргә кирәк, - ди ир белән хатын.

"Исток-Башлангыч" үзәге фотосы

https://leninogorsk.tatarstan.ru/index.htm/news/2306651.htm