Лениногорскида «Күрше фест» фестиваленең кышкы сезоны башланды

Лениногорскида «Күрше фест» республика халык фестиваленең кышкы сезонына старт бирелде. Бәйрәм  шәһәрнең Ленинград урамы, 43 - Гафиятуллин урамы, 9нчы йорт адресы буенча ишегалдында узды.

Бәйрәмне Лениногорск Балалар иҗат йорты уздырды. Алар шушы фестивальнең грантын откан иде. Хәзер алар берничә бәйрәм үткәрәчәк.

Әлеге  чара  «Киләчәк архитекторлары: кар көрте эчендә Төзелеш» дип аталды. Балалар кышкы төрле күңел ачуларда рәхәтләнеп уйнадылар. Кар белән уеннарда катнаштылар, тизлек һәм төгәллек буенча күнегүләр ясадылар, кышкы корылмалар төзеделәр, матур чыршы тирәли әйлән-бәйлән уйнадылар. Тәм-томнар белән кайнар чәй эчтеләр.  

Бәйрәмдә Лениногорск районы башлыгы Марат Гирфанов катнашты.

«Татарстан Рәисе Рөстәм Миңнеханов инициативасы буенча «Безнең ишегалды " программасы буенча үзгәртүләр бара, яңартылган территорияләрне күреп торабыз. Быел Лениногорскида 18 ишегалдын төзекләндердек, киләсе елда тагын 19ны планлаштырабыз. Ләкин яңарту гына түгел, ә аралашу мөһим. «Күрше» – чын-чынлап халык проекты, ул күршеләрне  берләштерә", – диде ул. 

фотолар: Балалар иҗат йорты