Лениногорскиның грек-рим көрәшчеләре Бөтенроссия турнирында бронза яулады

Спорт мәктәбе тренеры Руслан Лущиковның ике шәкерте бронза медальләр яулап алуга иреште.

Илкүләм ярышлар Яр Чаллының “Витязь” спорт мәктәбендә үтте.

Анда Россиянең ун төбәге – Башкортстан, Марий-Эл, Мордва, Татарстан, Удмурд республикалары, Пермь крае, Киров, Самара, Саратов һәм Ульяновск өлкәләре үзләренең иң оста көрәшчеләрен тәкъдим итте. Бөтенроссия бәйгесендә барлыгы 220 спортчы катнашты.

Лениногорск шәһәренең  ике грек-рим көрәшчесе  үз үлчәү категорияләрендә турнирның бронза призерлары булдылар. Аларның берсе - Арслан Яфасов. Ул 68 килограмга кадәр авырлыктагы көрәшчеләр арасында бил алышты һәм өченче урынга чыкты. Арслан- 2 нче урта мәктәп укучысы.

Призерларның икенчесе - Илназ Сәлахов, 10 нчы мәктәптә укый. Ярышларда ул 75 килограммга кадәр авырлыктагы көрәшчеләр арасында көч сынашты һәм шулай ук өченче булды. Яшь көрәшчеләрнең икесен дә тренер Руслан Лущиков өйрәтә.

Грек-рим көрәше бәйгесе СССР спорт мастеры А.А. Улеев истәлегенә үткәрелде.  Әлеге турнир 2016 нче  елдан бирле үткәрелә. Быел ул  беренче тапкыр Бөтенроссия дәрәҗәсендә узды.

фотолар: спорт мәктәбеннән