Лениногорскиның Туган якны өйрәнү музее якташыбызның легендар корабльдә хезмәт итүе турында мәгълүматны ачыклаган

Анда Бөек Ватан сугышы елларында легендар “Марат” линкорында Бәкер егете хезмәт иткән, дип язылган. 

«Марат» линкоры –  СССР Хәрби-диңгез флотының иң көчле һәм нәтиҗәле хәрби корабларының берсе. Ул совет-фин сугышында катнаша һәм Бөек Ватан сугышы вакытында Ленинградны саклауда мөһим роль уйный. “Марат” дөньяда магнит миналарыннан саклану системасын уңышлы сынап караган беренче корабль булды.

Музей хезмәткәрләре әйтүенчә, Шөгер һәм Яңа Писмәннән фронтка китүчеләр исемлеге белән эш иткәндә, алар үзләре дә кызыклы мәгълүматка тап булганнар.

“Иске Иштирәк авыл советы исемлегендә Ильяс Минәхмәтов исеме дә бар. Әлеге ир-егет 1915 елда туган һәм ул “Марат” линкорында старшина булып хезмәт иткән. Якташыбыз 1941 елның сентябрендә 23нче, 25нче числоларында һәлак булган. Кронштадтагы һөҗүмнәрдән соң, мөгаен. Без менә шушы тарих белән бүлешергә булдык һәм тиз арада әлеге батыр диңгезченең туганнары да табылып, алар белән элемтәгә керербез, дип ышанып калабыз”, - ди музей хезмәткәре Айгөл Рәхимова.