Песошин Татарстандагы иң зур зыян күрүче тармакларны атады

Зыяннарның иң зур суммасы автотранспорт чаралары җитештерү, күпләп һәм ваклап сату, азык-төлек продуктлары җитештерү, транспортировкалау һәм саклау кебек тармакларда барлыкка килде. Бу хакта ТР Премьер-министры Алексей Песошин ТР Дәүләт Советының 20 нче утырышында хәбәр итте.

«Узган ел ирешелгән нәтиҗәләргә һәм беренче кварталда икътисадта уңай динамикага карамастан, без мондый темпларның барлык тармакларны да тәэмин итмәвен аңлыйбыз. Шулай ук сумнар курсы экспортка басымны һәм эчке базарда импортерлар белән конкуренцияне көчәйтә. Үзәк банкның югары төп ставкасы предприятиеләрне заем акчаларын җәлеп итүдә чикли, бу производство үсешен тоткарлауга китерә", - дип белдерде ул.

Шуңа бәйле рәвештә, Песошин сүзләренчә, хезмәт базарында киеренкелек саклана – вакансияләр булуга карамастан, барлык тармакларда да диярлек кадрлар кытлыгы бар. Моннан тыш, кредитлар буенча срогы чыккан бурычлар һәм предприятиеләр һәм оешмаларның бурыч йөкләнеше арта, ә табыш кимү зыянның сизелерлек артуы белән бергә бара, дип өстәде ул.

Аның фикеренчә, тармакларның нәтиҗәлелеген күтәрү, югары технологияле продукция күләмнәрен арттыру буенча системалы чаралар кирәк.

Татар-информ