Татарстан Фәннәр академиясе профессоры Индус Таһиров 90 яшен билгеләп үтә

Үзенең 90 яшьлек юбилеен бүген – 24 майда якташыбыз,  тарих фәннәре докторы, профессор һәм ТР Фәннәр Академиясенең хакыйкый әгъзасы Индус Ризак улы Таһиров билгеләп үтә. Бу хакта  республика Фәннәр академиясенең матбугат хезмәте хәбәр итә., дип яза Вечерняя Казань.

Индус Ризак улының фәнни эшчәнлеге Россиядәге революцион, милли хәрәкәтләр тарихын һәм Татарстанның милли-Дәүләт төзелешен өйрәнү белән бәйле. Академик җитәкчелегендә 30лап кандидатлык диссертациясе әзерләнгән. Шулай ук Таһиров 10 фән кандидатының фәнни консультанты була.

"Үзенең беренче хезмәтләрендә: «Казандагы Восстание үзенчәлекләре мәсьәләсенә», «20 нче еллар әдәбиятында Казан октябре», «февральдән октябрьгә кадәр» (авторлыкта) Индус Таһиров тарих фәнендә беренчеләрдән булып илнең иҗтимагый үсешендә милли факторның урынын һәм ролен билгели»,-диелә Татарстан Фәннәр академиясе сайтында Индус Ризак улының биографиясе турында.

Таһировның монографияләре һәм фәнни басмалары Россиядә генә түгел, чит илләрдә дә югары бәя алды — шул исәптән АКШ, Англия, Төркия, Япония, Франциядә.

Индус Таһиров 1936 елның 24 маенда  ТАССРның Лениногорск районы, Иске Шөгер авылында дөньяга килә. Әлмәт шәһәрендә урта мәктәп, 1963 елда КДУның тарих һәм филология факультетын, 1966 елда КДУ аспирантурасын тәмамлый. 1967 елда диссертация яклап тарих фәннәре кандидаты була. 1979 елда исә докторлык диссертациясен яклый. 1980 елдан профессор, КДУ тарих кафедрасы мөдире. Татарстан Республикасы халык депутаты, 1995 елда Татарстан Республикасы Дәүләт Советы депутаты була.

Якташыбызны чын күңелдән котлыйбыз, сәламәтлек, тынычлык, иминлек телибез.