Түбән Чыршылы артистлары яз бәйрәме уңаеннан спектакль куйды (+ фотолар)

Мөнирә Сафинаның "Ак болыт" драмасы барлык тамашачының күңеленә хуш килде, дип хәбәр итә Түбән Чыршылы китапханәсе.

Хәзерге заманның актуаль проблемасына әйләнгән туган нигезне ташлау, олыгайган ата-анага мәрхәмәтсез булу кебек темаларны үз эченә алган драма елатты да, уйланырга да мәҗбүр итте.

Спектакльдә катнашучы артистларыбыз үз рольләренә кереп, осталык белән башкардылар. Зөлфирә Камалтдинова, Резедә Ситдикова, Римма Хасанова, Рәисә Сафина, Рушания Гарифуллинага зур рәхмәт белдереп, иҗади уңышлар телибез.
Шулай ук, режиссер, декорация, тавыш куелышлары өчен җаваплы авыл мәдәният йорты директоры Раилә Әхмәдиеваның да хезмәте күренеп тора.

Пәрдә алышынганда үзенең әниләргә багышланган шигырьләрен бүләк итүче Гөлнур Кәримованың,  мөнәҗәт башкаручы Флера апа Насибуллинаның чыгышы да чарага ямь өстәде.

Үзешчән артистларга рәхмәт сүзләрен белдерүче, залдагы хатын-кызларны бәйрәм белән котлаучы авылдашлары да булган.

"Җидегән чишмә" коллективына матур рольләр, иҗат уңышлары, сәламәтлек телибез, шулай алга таба да спектакльләре белән сөендерсеннәр.

Язманы тулысынча "Заман сулышы" газетында, 15 март санында укый аласыз.

фотолар: авыл мәдәният йортыннан