Казанда йөзү буенча узган ярышларда Лениногорск командасы икенче урын алды

Казанның Су спорт төрләре сараенда йөзү буенча «Буыннар бәйләнеше» республика ярышлары узды.

Ярышларда Татарстан Республикасының 44 муниципаль районы командалары катнашты. Команда составында 55 яшьтән олырак әби яки 60 яшьтән олырак бабай һәм 14 яшькә кадәрге балалар – оныклар иде.

Лениногорск шәһәрен  Любовь Гыйләҗева һәм аның оныгы Родион Олейников тәкъдим иттеләр. Родион – 7нче мәктәп укучысы.

Ярышларда өлкән яшьтәгеләр арасында шәхси беренчелектә Любовь Гыйләҗева өченче урынны яулады.

14 яшь һәм аннан кечерәк катнашучылар арасында шәхси беренчелектә оныгы Родион Олейников өченче урынны алды.

Шулай ук 2х50 м катнаш эстафетада команда беренчелегендә Любовь Гыйләҗева һәм Родион командасы  икенче урынны алды.

Ә инде гомумкоманда беренчелегендә Лениногорск команда икенче урынны алды.

«Россия Пенсионерлар союзы”ның җирле бүлеге Лениногорск районы клиентлар хезмәте җитәкчесе Айгөл Исламовага команданың республика ярышына баруын оештырган өчен рәхмәт белдерә.

фотолар: Фәридә Усмановадан