Лениногорск ЗАГС бүлегендә патшалар игезәкләре тууы теркәлде

Патшалар (корольләр) игезәкләре дигән төшенчә бар. Бу әни кеше бер үк вакытта игезәк бала - малай һәм кыз тапкан очракта әйтелә. 

Король игезәкләренең тууы сирәк була торган вакыйга. Статистика буенча, төрле җенесле игезәкләр барлыкка килү ихтималы 1 мең балага якынча берне тәшкил итә. 

Игезәк балалар әти-әниләре -  Мортазин Таһир белән Алинәгә нәкъ менә шундый  сирәк очрый торган  бүләк булды. Бер минут аерма белән аларның кызлары Илүзә һәм уллары Инсаф туган. Игезәкләр тугач, гаилә күп балалы булды. Мортазиннарның хәзер дүрт  баласы бар! 

ЗАГС хезмәткәрләре бәхетле әтигә сабыйларның беренче документлары – туу турында таныклыклар һәм Татарстан Республикасы Рәисеннән котлау адреслары тапшырдылар. 

фото: ЗАГС бүлегеннән