Лениногорскида Кышкы Сабантуйда этләр җигеп тә йөрделәр

Лениногорскида - Кышкы Сабантуй. Ул Сабантуй уза торган мәйданда күңелле итеп үтте.

Бәйрәмне “Татнефть-Актив” җәмгыяте профкомы СП Татнефть-ЛУТР хезмәткәрләре гаиләләре өчен уздырды. Бәйрәм алда торган юбилейлар – Татарстан нефтенең – 80, Ромашкин нефть ятмаларының 75 еллыгына багышланган иде. 

Кышкы Сабантуйда җәядән атып карадылар, чаңгыда шудылар, әлбәттә, җигелгән этләрдә йөрделәр.

“Мин өч балабыз белән килдем. Алар җигелгән этләрдә йөрделәр, җәядән атып карадылар. Беренче тапкыр снегоходларда йөрдек, урман буенча әйләнеп килдек. Бик яхшы әзерләнгән”, - ди Марат Мусин.

Салкын көн беркемне дә куркытмады. Зур палаткалар эченә кереп җылынырга була иде. Теләүчеләр өчен хуш исле пихта чәе дә тәкъдим итәләр.

Ачык казанда тәмле пылау пеште. Барысына бәйрәм ошады.
 

Айсылу Габбасова фотолары