Татарстанда кыргый этләрне ау ресурслары исемлегенә кертү тәкъдим ителә

Бу мәсьәлә республика парламенты комитеты утырышында каралды.

Татарстан Дәүләт Советының Экология, табигатьтән файдалану, агросәнәгать һәм азык-төлек сәясәте комитеты утырышында кыргый этләр белән бәйле мәсьәлә каралды. Республикада аларның санын исәпләү методикасын әзерләү һәм киләчәктә ау ресурслары исемлегенә кертү буенча закон проекты эшләү тәкъдиме яңгырады.

Комитет рәисе Нәҗип Хаҗипов хәбәр иткәнчә, моңа кадәр Татарстан Хөкүмәте хисабын караганда ТР Биологик ресурслар буенча дәүләт комитетына тиешле тәкъдимнәр бирелгән. Алар арасында кыргый этләрнең санын исәпләү тәртибен әзерләү һәм аны профильле дәүләт органнары белән килештерү бурычы да бар.

«Кыргый этләрне исәпләү методикасын әзерләгәннән соң, аларны ау ресурсы итеп тану турында закон проектын Татарстан Дәүләт Советына кертү күздә тотыла», — дип билгеләп үтте  Хаҗипов.

План буенча, әлеге закон проекты 2026 елның икенче яртыеллыгында әзерләнергә һәм республика парламенты каравына тәкъдим ителергә тиеш.

Утырышта катнашкан депутатлар комитет рәисенең тәкъдимен бертавыштан хуплады. Карар комитетның рәсми документларына кертеләчәк.

Татарстанда кыргый этләр мәсьәләсе табигать ресурсларын саклау, хайваннар дөньясын исәпкә алу һәм экологик иминлек өлкәсендәге актуаль темаларның берсе булып кала.

Татар-информ

фото: Заман сулышы