Исерек килеш рульдә булганмы, әллә шофер урынында гына утырып торганмы: Лениногорск суды гаепле шофер эшен тикшерә

Руль артында утыручы ир-атның аек булуы аңарда шик тудырган.

Инспектор шоферның алкотектор яисә медицина тикшерүе узуын таләп иткән. Әмма ир-ат хокук сагында торучы хезмәткәрнең законлы таләбеннән баш тарткан.

Инспектор шоферга карата беркетмә төзеп, алга таба шул беркетмә нигезендә эш иткән: машина йөртүчене идарә итүдән читләштергән, транспорт чарасын  махсус штрафстоянкага эвакуацияләгән.

 Ир-атка карата ачылган административ эш судка җибәрелгән. Әмма ул судка үзе килеп йөрмәгән, аның мәнфәгатьләрен ышанычлы кешесе яклаган. 

Адвокат белдергәнчә, гаепләнүче бары тик шофер урынында утырып кына торган. Исерек хәлдә булганга күрә, ул пассажир утыргычына күчеп утырган һәм автомобиль белән идарә итүне аек хәлдә булган кешегә тапшыру өчен, абыйсы, йә дусты килгәнен көтеп торган.

Суд утырышында катнашкан ГАИ инспекторы хәбәр иткәнчә, гаепләнүче ир-ат утырган чит ил маркалы автомобиль хәрәкәт юлында торган: «Машина йөртүче транспорт белән идарә итү хокукына документлар бирмәде, аларны өйдә онытып калдырганмын диде”, - дип аңлаткан автоинспектор.

Суд әлегә бернинди карар чыгармады, өстәмә суд тыңлаулары билгеләнде. Әгәр ир-атның гаепле булуы исбатланса, аңа җитди җәза яный: исерек хәлдә  транспорт чарасы белән идарә иткән өчен – 45 мең,  медицина тикшерүен узудан баш тарткан өчен 45 мең сум штраф каралган. Шулай ук ел ярымнан ике елга кадәр транспорт чарасы белән идарә итү хокукыннан да   мәхрүм ителү көтә.