Исерек хәлдә рульгә утыру лениногорскилы хатын-кызга 90 мең сумга төшкән

Шушы елның 10 гыйнварында ДАИ хезмәткәрләре шәһәрнең Агадуллин урамында бер машинаны туктаталар. Рульдә хатын-кыз була. Полиция хезмәткәре аңарда исереклек билгеләрен күрә:  алкоголь исе килә, Хатын-кызның сөйләме дә үзгәргән була.  

Инспектор машина йөртүчегә алкотестер ярдәмендә медицина тикшерүе узарга тәкъдим итә, ләкин хатын-кыз  катгый рәвештә баш тарта.

Тикшерү узудан баш тарту транспорт чарасы белән идарә итүдән читләштерергә дигән беркетмә төзелә.  Автомобиль штрафстоянкага җибәрелә.

Лениногорск суды автоледига карата ике административ эшне караган. Беренче эш буенча ул Россия Федерациясе Административ хокук бозулар турында кодексының 12.8 маддәсенең 1 өлеше буенча гаепле дип табылды («транспорт чарасы белән исерек хәлдә идарә итү»). Икенче эш - РФ КоАП 12.26 маддәсенең 1 өлеше буенча (“медицина тикшерүе узудан баш тарту").

35 яшьлек хатын-кыз  үз гаебен таныган, ләкин ни өчен руль артына исерек хәлдә утыруын аңлата алмаган.

Судья аңа карата хөкем карары чыгарды:
- Исерек килеш машина йөрткән өчен 45 000 сум күләмендә штраф.
- 1 ел һәм 6 айга машина йөртү таныклыгыннан мәхрүм ителде
- Тикшерүдән баш тарткан өчен 45 000 сум күләмендә өстәмә штраф.

Штрафның гомуми суммасы 90 000 сум тәшкил итә, аны ике ай эчендә түләргә кирәк. Суд карары үз көченә кергәннән соң 10 көн эчендә хатын-кыз машина йөртү таныклыгын дәүләт автоинспекциясенә тапшырырга тиеш.

Суд утырышы ахырында судья хокук бозган хатын-кызны, әгәр хокукларыннан мәхрүм итү чорында руль артына утырса, аңа административ җаваплылык яный, дип кисәткән. Исерек хәлдә автомобиль белән кабат идарә иткән очракта хатын-кыз җинаять җаваплылыгына тартылырга мөмкин.