Күп күләмдә спиртлы эчемлек кулланып, рульгә утырган лениногорскилы ир-ат судта гамәле өчен үкенүен, кредит бурычы барлыгын белдерә

Лениногорск суды тагын бер исерек килеш автомобиль белән идарә итүчегә карата административ эшне карады. Бу юлы хокук бозучы 45 яшьлек ир-атны юл хәрәкәте иминлеге инспекторлары Садриев урамының 67 нче йорты янында туктаталар. 

Алкотектор приборы руль артында утыручының канында, сулаган һаваның бер литрына - 0,921 миллиграмм этил спирты күрсәткән. Бу исереклекнең көчле дәрәҗәдә булуын күрсәтә. Мондый хәлдә инде кешенең үз-үзен контрольдә тотуы  бөтенләй  юк дәрәҗәсендә була. 

Суд каршына баскач, ир-ат үзенең  руль артына исерек килеш утырып хокук таләпләрен бозуы, бик зур хата ясавы белән килешә. Ул хәтта үзенең мондый эшләргә  һәрвакыт каршы булуын, исерек хәлдә руль артына утыручыларны җинаятьчеләр белән тиңләвен әйтә. 

Әмма шулай булуга карамастан,  алкогольле эчемлекләр кулланганнан соң ни сәбәпле машинасына утыруын аңлата алмый.

Ир-ат үз гаебен танып, судтан кылган эшенә үкенүен исәпкә алуны сорый, гаиләсе, балигъ булмаган яшьтәге ике баласы барлыгын әйтә. Кредит бурычлары булу сәбәпле, өстәмә керем булсын өчен машинасын ул такси итеп куллануын да белдерә.

Әмма закон транспорт чарасы белән исерек хәлдә идарә итүчеләргә карата катгый. Сәбәпләр җитди булса да, ир кешегә 45 мең штраф түләргә, ел ярым дәвамында автомобиль йөртүгә бәйләнмәгән эш белән шөгыльләнергә туры киләчәк.
Карар әлегә законлы көчендә түгел, шикаять ителергә мөмкин.