Лениногорск суды карары нигезендә исерек шоферга җәза билгеләнде

Хәмер кулланганнан соң автомобиль руле артына утырып, шәһәр урамнары буйлап сәяхәткә чыккан 36 яшьлек ир-атны, төнге 2 дә  инспекторлар туктата. Әлеге хәл шәһәрнең Лермонтов урамы 48 нче йорты янында була.

Инде машиналар да, җәяүлеләр дә йөрүдән туктаган бу вакытта,  юл буйлап сәер генә хәрәкәтләнүче автомобиль  инспекторларның игътибарын аеруча җәлеп итә. Кызу тизлектә килүче  шофер юл иминлеге хезмәте вәкилләре машинасын ерактан күреп ала. Шуннан инде “каракның бүреге яна башлый”, ул   юлын дәвам итәргә дә яисә берәр җаен табып, инспекторларның күз алдыннан югалырга да белмичә аптырап, сүлпән генә хәрәкәтләнә башлый.

Инспекторлар туктаткач, исерек шофер берничек тә карышып маташмый, медицина тикшерүе үтүдән дә баш тартмый. Әмма үзенең ни сәбәпле исерек хәлдә руль артына утырганлыгын берничек тә аңлата алмый. Ә тикшерү исә ир-атның канында алкогольнең шактый күп күләмдә булуын күрсәтә.

Суд каршына баскач ул үзенең гаебен таный,  уйламыйча кылган эшенә бик үкенүен белдерә. Әмма хокук сагында торучыларның карары ныклы, исерек шоферны “беренче юлга гына”  беркем дә кичерергә җыенмый. Лениногорскилы 45мең сум штрафка тартыла һәм ел ярымга йөртү хокукыннан мәхрүм ителә.

Юл хәрәкәте кагыйдәләрен бозган өчен ул элегрәк тә административ җаваплылыкка тартылган була. Суд карары әлегә көченә кермәгән, шикаять ителергә мөмкин.