Лениногорск судында 26 яшьлек ир-егет исерек килеш рульгә утыру сәбәбен әйтсә дә, суд карары катгый

Тимәш авылы янындагы юл боҗрасында, исерек килеш  инспекторларга юлыккан 26 яшьлек егет «хатынымның әнисенә ашыгыч ярдәм кирәк булды, шуңа күрә эчкән килеш рульгә утырырга туры килде», дип  аңлатма биргән. Юк, яшь кеше табиб яисә фельдшер булмаган, мондый ярдәм кирәккән очракта – 03 номерына шалтыратырга мөмкинлеген дә башыннан чыгарып җибәргән.

ГАИ инспекторы алкотектор ярдәмендә шоферның исереклелек халәтен тикшереп караган. Билгеле, гади күзгә дә ташланыр торган нәрсәне, җайланма да исбатлаган.

Лениногорск суды, руль артына алкогольле эчемлекләр кулланып утырган яшь кешене Россия Федерациясе административ кодексының 12.8 маддәсе 1 нче өлеше нигезендә 1 ел да 6 айга йөртү хокукыннан мәхрүм итте һәм 45 мең сум штрафка тартты. Карар әлегә законлы көчендә түгел, шикаять ителергә мөмкин.